पाक क्रिकेट प्रशिक्षकपद चॅपेल यांनी नाकारले

नवी दिल्ली - इंतिखाब आलम यांच्याऐवजी पाकिस्तानी क्रिकेट मंडळाने राष्ट्रीय संघाचे प्रशिक्षक म्हणून ग्रेग चॅपेल यांना करारबद्ध करण्याचे ठरविले आहे. चॅपेल गुरुजींनी मात्र त्यांचा प्रस्ताव फेटाळला आहे. भविष्यात आंतरराष्ट्रीय पातळीवर कधीही प्रशिक्षण देणार नाही, असेही त्यांनी स्पष्ट केले आहे. त्यांनी सांगितले, की पाक मंडळाचे मुख्य कार्यकारी अधिकारी वसीम बारी यांनी मला दूरध्वनी केला. त्यांनी प्रस्ताव ठेवल्यामुळे मला सन्मानित झाल्यासारखे वाटले; पण मी तो नाकारला. यापुढे आंतरराष्ट्रीय पातळीवर प्रशिक्षक म्हणून सक्रिय होण्याची महत्त्वाकांक्षा मी ठेवलेली नाही.